26/04/2022. 15:07
Shefi i grupit parlamentar të PDK-së, Abelard Tahiri, ka thënë se janë 8 sinjalizues nëpër institucione të Kosovës të cilët ua kanë ofruar të dhënat për tre muajt e fundit se si ka ndodhur subvencionimi i rrymës prej 100 milionë euro dhe sa ka prodhuar, eksportuar dhe importuar rrymë Kosova gjatë krizës së tre muajve të kaluar.
Ai ka thënë se nëse formohet Komisioni Hetimor ata do t’i ftojnë këta 8 persona që sipas tij kanë dijeni për të gjitha zhvillimet me rrymës.
“Ne kemi dyshime konkrete, ajo çka është e rëndësishme është se janë një numër i vogël i njerëzve, që nuk e kalojnë besoj shifrën 8, të cilët në këto institucione i dinë zhvillimet krejt për këto çështje. Ne sot nuk kemi mandat për t’i pyetur ata njerëz për të gjitha këto dhe pikërisht është e nevojshme formimi i Komisionit Hetimor që do t’i ftojmë këta 7 apo 8 persona në institucionet e Kosovës të cilët kanë dijeni për çdo zhvillim”, ka thënë ai.
Ai tha se shifrat që kanë prezantuar tregojnë se Kosova s’është përfshirë nga kriza globale e rrymës pasi ka prodhuar energji.
“Këto të dhëna janë gjysmake pa praninë e tyre dhe pa nxjerrë në pah se sa për qind prej atyre parave 100 milionë eurove janë shpenzuar, si janë shpenzuar ata para, pse është ngritë çmimi i energjisë elektrike 100 për qind kur kriza rajonale dhe globale nuk na ka afektuar sepse e kemi pasur prodhimin tonë të brendshëm. Sipas këtij projektimi ne kemi importuar pesë për qind rrymë në këta tre muaj kritikë, pikërisht janë këta sinjalizues që na kanë sjellë të dhënat”, ka thënë ai.