“Lindi më 1942 në fshatin Vilanc, komuna e Vushtrisë. Shkollën fillore e mbaroi në vendlindje, ndërsa në vitin 1961 kreu Shkollën Normale në Prishtinë.” – Shkruan Vushtrria.info.
Gjatë vitit shkollor 1961/62 ka punuar mësues në shkollën fillore të Samadrexhës dhe të Maxhunajve të komunës së Vushtrrisë.
Në vitin shkollor 1962/63 u regjistrua në studimet e matematikës në Fakultetin Filozofik të Prishtinës. U diplomua më 1966.
Gjatë vitit shkollor 1966/67 punoi profesor i lëndës së matematikës në Shkollën e Mesme Teknike të Prishtinës.
Në tetor të vitit 1967 ka mbajtur ushtrimet nga Analiza matematike I në Katedën e Matematikës të Fakultetit Filozofik të Prishtinës.
Në mars të vitit 1968 zgjidhet asistent në Katedrën e Matematikës. Më 1969 u regjistrua në studimet pasuniversitare në Fakultetin e Shkencave Matematike-Natyrore të Beogradit.
Në vitin shkollor 1970/71 autorizohet të mbajë ligjërata nga lënda Analiza matematike I në Katedrën e Matematikës të FSHMN-së.
Në vitin 1974 mbrojti temën e magjistraturës me titull: Transformimi dhe shumimi i serisë Fourier të një funksioni të vazhdueshëm në Fakultetin e Shkencave Matemaike-Natyrore të Beogradit.
Gjatë periudhës shkurt 1978-shkurt 1979 ka qëndruar në specializim në universitetin “Lomonosov” të Moskës. Në maj të vitit 1979 ka mbrojtur tezën e doktoratës me titull: Vlerësimi i koeficientëve Fourier të disa klasa funksionesh. Po në këtë vit zgjidhet docent në lëndën Analiza matematike I në Seksionin e Matematikës në FSHMN të Prishtinës.
Në maj të vitit 1982 u zgjodh profesor inordinar në lëndën Analiza matematike I, ndërsa në mars të vitit 1987 profesor ordinar në FSHMN të Prishtinës.
Më 24 dhjetor 1996 u zgjodh anëtar korrespondent, ndërsa më 20 dhjetor 2000 anëtar i rregullt i ASHAK-ut.
Gjatë kësaj periudhe, që nga viti 1967, si asistent, docent, profesor inordinar dhe ordinar në Seksionin e Matematikës ka ligjëruar lëndën Analiza matematike I, II, III dhe kurse të përgjithshme të matematikës në fakultete të tjera të Universitetit të Prishtinës.
Është angazhuar nga viti shkollor 1979/1980 në studimet pasuniversitare. Ka udhëhequr seminarin nga Analiza matematike në këto studime. Gjithashtu ka qenë udhëheqës i disa kandidatëve në magjistraturë dhe doktoratë. Ka qenë kryesues i Kryesisë së Shoqatës së Matematikanëve, Fizikanëve dhe Astronomëve të Kosovës. Dy mandate zgjedhore, duke filluar nga viti shkollor 1981/82 deri më 1984/85, ka qenë shef i Seksionit të Matematikës.
Nga tetori i vitit 1985 deri në tetor të vitit 1987 ka kryer detyrën e prodekanit të FSHMN-së. Në vitin 1987 zgjidhet dekan i FSHMN-së, ndërsa në vitin 1989 rizgjidhet në detyrën e dekanit. Në qershor të vitit 1991 shkarkohet nga kjo detyrë me masat e dhunshme të pushtetit serb.
Është laureat i Shpërblimit të Dhjetorit të vitit 1983. Në periudhën 1994-1996 ka qenë udhëheqës i studimeve pasuniversitare në Seksionin e Matematikës.
Ishte korrespondent i Mathemmaticial Reviews dhe anëtar i American Mathematical Society.
Gjatë periudhës 1985-1991, sa e ka parë dritën revista Punime matematike, ka qenë redaktor i saj si dhe i revistës Kërkime dhe sekretar i Seksionit të Shkencave të Natyrës të ASHAK-ut.
Vdiq më 2010, duke lënë pas vetës një numër të madh të punimeve shkencore nga matematika si dhe një numër të madh të librave nga kjo fushë.
Ai padyshim konsiderohet si një nga matematikanët më të mirë që ka pas Kosova.
