14/02/2022 14:22
Ministrat e Financave të grupit G7 thonë se ngritja e ushtrisë ruse në kufirin ukrainas është një shkak për “shqetësim të madh” dhe paralajmërojnë se janë të përgatitur të vendosin një paketë të madhe sanksionesh ekonomike nëse Moska vendos të pushtojë fqinjin e saj të afërt.
Në një deklaratë të lëshuar të hënën në mëngjes, ministrat e financave nga grupi i kombeve më të pasura demokratike në botë – duke përfshirë Mbretërinë e Bashkuar, SHBA dhe Gjermaninë – thonë se prioriteti i tyre i menjëhershëm “është të mbështesin përpjekjet për të de-përshkallëzuar situatën”.
Megjithatë, ata paralajmërojnë se nëse Rusia rrit veprimet ushtarake, grupi është i përgatitur “të vendosë kolektivisht sanksione ekonomike dhe financiare të cilat do të kenë pasoja masive dhe të menjëhershme në ekonominë ruse”, shkruan BBC, transmeton Klankosova.tv.
“Ne, Ministrat e Financave të G7, nënvizojmë gatishmërinë tonë për të vepruar me shpejtësi dhe vendosmëri për të mbështetur ekonominë ukrainase, duke mbështetur gjithashtu përpjekjet e vazhdueshme për të identifikuar urgjentisht një rrugë diplomatike drejt de-përshkallëzimit.
Megjithatë, gjatë fundjavës Viktor Tatarintsev, ambasadori i Rusisë në Suedi, u tall me premtimin e sanksioneve perëndimore, duke pretenduar se presidenti Vladimir Putin nuk ishte i trembur nga kërcënimet.
Ai shtoi se “sa më shumë Perëndimi ta shtyjë Rusinë, aq më e fortë do të jetë përgjigja ruse”.