03/02/2022
Dy zyrtarë policorë janë suspenduar pas arrestimit të kameramanit të Ekonomia Online, Albion Selitaj, derisa ishte duke mbuluar ngjarjen nga ndërhyrja e AKP-së për të marrë në menaxhim zyrat e ndërmarrjes “AgroKosova Holding“.
Po ashtu edhe ndaj pesë zyrtarëve të tjerë policorë është inciuar procedurë e brendshme disciplinore.
Këtë e kanë konfirmuar zyrtarisht edhe Policia e Prizrenit.
“Me datë 03.02.2022, Policia e Kosovës në këtë rast Drejtoria Rajonale e Prizrenit ka suspenduar përkohësisht dy zyrtarë policorë dhe ndaj pesë zyrtarëve të tjerë ka iniciuar procedurë të brendshme disiplinore, të cilët kanë qenë të inkuadruar në realizimin e planit policor në asistencë të Agjencisë Kosovare të Privatizimit (AKP-së) në komunën e Suharekës, me ç’rast kanë arrestuar një person për pengim të personit zyrtar gjatë kryerjes së detyrës zyrtare”.
Në njoftimin e policisë thuhet se suspendimi i tyre është mbështetur në udhëzimin administrativ të PK-së për shkeljet, masat dhe procedurat disiplinore në Policinë e Kosovës, me qëllim të hetimit dhe sqarimit të veprimeve dhe sjelljeve të tyre në këtë rast.
Lidhur me këtë rast është njoftuar Drejtoria e Standardeve Profesionale e PK-së dhe Inspektorati Policor (IPK).
Pas marrjes në pyetje në stacionin policor në Suharekë, kameramani Albion Selitaj është liruar.