14/03/2022. 14:29
Presidentja e Kosovës, Vjosa Osmani, sot ka vizituar komunën e Mitrovicës, ndërsa duke folur për sigurinë në rajon tha se Serbia me fjalë ka zgjedhur rrugën evropiane, por “me vepra është në rrugën e Putinit”.
Presidentja Osmani e pyetur për deklaratën e presidentit të Serbisë, Aleksandar Vuçiq lidhur me kryeministrin e Kosovës, Albin Kurti dhe presidentin e Malit të Zi, Milo Gjukanoviq, rreth çështjes së armatimit tha se nuk pret asgjë nga një njeri që e përkrah kriminelin e luftës, Sllobodan Millosheviqin.
“Nuk pres asgjë nga një njeri që e përkrah Millosheviqin”, u shpreh Osmani gjatë një konference për media të mbajtur në Mitrovicë, bashkë me kryetarin e kësaj komune, Bedri Hamzën.
“Akoma nuk e ka dënuar asnjë nga krimet e Millosheviqit. Ne një ndër masakrat do ta përkujtojmë në Mitrovicë, deri në mes të qershorit ka përkujtime të masakrave. Një njeri që e vazhdon mendësinë e Millosheviqit, nuk presim të flasë me gjuhë të argumentuar”, shtoi ajo.
Osmani foli edhe për armatimin e Serbisë, duke e quajtur shqetësuese, pasi sipas saj, Serbia nuk është e interesuar për stabilitet.
Ndryshe, Presidenti i Serbisë, Aleksandar Vuçiq, të mërkurën i është drejtuar kryeministrit të Kosovës, Albin Kurti dhe presidentit të Malit të Zi, Milo Gjukanoviq, duke ju kërkuar ta lënë Serbinë të qetë, pasi këta dy të fundit e akuzuan shtetin fqinj për blerjen armëve nga Kina.
“Lëreni Serbinë të qetë dhe mos e mashtroni opinionin. Serbia do ta ruajë paqen dhe stabilitetin dhe ne jemi krenarë për faktin se vetë duam ta mbrojmë vendin tonë”, ishte shprehur Vuçiq, në një konferencë për media.