13\01\2022 16:17
Mbrojtësi i Juventusit, Leonardo Bonucci u gjobit me 10,000 euro pas një grindjeje me sekretarin e Interit, Cristiano Mozzillo.
Bonucci e shtyu anëtarin e stafit të Interit pas fitores së vonshme të Nerazzurrëve falë golit të Alexis Sanchez kundër Zonjës së Vjetër në përballjen finale të Superkupës së Italisë të zhvilluar të mërkurën mbrëma.
Mbrojtësi veteran ishte rikuperuar nga një dëmtim dhe ishte në fushë, duke pritur që të futej si zëvendësues në sekondat e fundit të shtesës, për të ekzekutuar një penallti në gjuajtje.
Sipas mediumit Il Tempo, Bonucci, madje i ka bërtitur “do të të vras”, ish-anëtarit të stafit të Napolit.
U raportua se Bonucci mund të ishte përballur me një ndalim prej një apo më shumë ndeshjeve pasi hetuesit federalë kishin parë skenën dhe e kishin raportuar atë.
Megjithatë, Prokurori Federal e gjobiti italianin me 10 mijë euro, kështu që Bonucci do të jetë në dispozicion kur Zonja e Vjetër të presë Udinesen në Allianz Stadium në ndeshjen e tyre të radhës në Serie A të shtunën.